Համառոտ նկարագրություն
RippleFlow կրթական-ինքնազարգացման նախագիծը մեկնարկում է իր հերթական նախաձեռնությունը․ հանրօգուտ կամավորական աշխատանք երիտասարդների համար։ Կամավորական աշխատանքը կրում է էկոլոգիական բնույթ։ Կամավորության շրջանակում մասնակիցները՝ կրթահամալիրի սովորողներ և այլ պատանիներ, կայցելեն տարբեր կենդանիների ապաստարաններ, հոգ կտանեն անտուն կենդանիներին, կտան խնամք, կօգնեն ապաստարաններին հանրօգուտ աշխատանքներում և վեր կհանեն այն հիմնախնդիրները, որոնք վերաբերում են Հայաստանում անտուն և կարիքավոր կենդանիներին։
Նախագիծը՝
- Նորարարական է․ դեռևս չկան նման դպրոցական նախագծային խմբեր, ովքեր նախաձեռնում և հետևողականորեն իրականացնում են նման կամավորություններ ապաստարաններում։
- Հանրօգուտ է․ Հայաստանում կենդանիների՝ հատկապես թափառական շների և կատուների հիմնախնդիրը գնալով սրանում է։ Այս կամավորական աշխատանքով մեր նախագծային խումբը նպատակ ունի հիմնախնդիրը վեր հանել նաև դպրոցական մակարդակներով և խնդրին լուծում տալ սովորողների տեսանկյունից՝ հնարավորություն տալով պատանիներին խնդիրն ուսումնասիրել նաև գործնական դաշտում։
- Շարունակական է․ Կամավորական աշխատանքը անժամկետ է։ Աշխատանքները շարունակվելու են, քանի դեռ ունենք բավարար չափով կամավորներ, ցանկություն և կամք՝ կանգնելու նման էկոլոգիական խնդրի առջև և փորձելու լուծում տալ դրան։