Բացման խոսք
Բարի լույս և բարի շաբաթվա սկիզբ բոլորին, սիրելի դասավանդողներ և սովորողներ։ Ավագ դպրոցը լավ և արդյունավետ օրվա սկիզբ է մաղթում բոլոր Սեբաստացիներին։ Ուրախ ենք ձեզ ողջունել Մարմարյա սրահում այս յուրահատուկ օրվա կապակցությամբ։ Եվ շաբաթվա առաջին ընդհանուր պարապմունքը ձեզ համար սիրով կվարենք ես և Մարիաննան։
Այժմ, խնդրեմ ասեք, սրահում կա՞ն մարդիկ, ովքեր գիտեն, թե այսօր ինչ օր է։ Մայիսի 22-ը աշխարհահռչակ հայ մեծ շանսոնյեի ծննդյան օրն է։ Եվ սույն թվականի այս օրը մեծն երգահանը կդառնար 99 տարեկան, ուստի այսօրվա առավոտյան ընդհանուր պարապմունքը նվիրվում է ֆրանսիահայ երգիչ Շառլ Ազնավուրի 99-րդ տարեդարձին։
Դիտենք մի փոքր տեսանյութ Ազնավուրի մասին, որից հետո մեզ սպասում է քսան րոպե ուրախ տրամադրություն և ազնավուրյան շունչ ողջ սրահով մեկ։ Ծնունդդ շնորհավոր, շանսոնյե Ազնավուր։
Միանում է տեսանյութը
9 տարեկանից Ազնավուրը արդեն երգում էր և ելույթ ունենում բեմի վրա, 1936 թ.-ից դեբյուտ է ունենում կինոյում, և արդեն 1940-ականների կեսերից Ազնավուրի կյանքի գլխավոր գործն է դառնում երգը։ Շառլ Ազնավուրը չէր սիրում, երբ իրեն «կենդանի լեգենդ» էին կոչում։ Նրա ստեղծագործ էությունը սահմաններ չուներ՝ պոետ, կոմպոզիտոր, գրող, սցենարիստ, դերասան, ռեժիսոր։ Եվ շատերը նրան հիշում են որպես իր իսկ հեղինակած երգերի կատարող, ֆրանսիական շանսոնի ամենավառ ներկայացուցիչ։
Այժմ, սրահի կենտրոն հրավիրենք սովորողներ Մերի Երեմյանին և Էլֆրիդա Բրուտյանին։ Pour toi Arménie, “Քեզ համար, Հայաստան”, ընթերցում են աղջիկները։
Ընթերցում են բանաստեղծությունը
Ծափահարենք աղջիկներին արտասանության համար։
Մաեստրոն չէր սիրում նշել իր ծննդյան տարեդարձը եւ չէր սիրում հիշել իր տարիքը։ Նրա կարծիքով՝ մարդը նաեւ զառամյալ տարիքում պետք է ապրի այնպես, ասես 30 տարեկան է։
Ազնավուրը գրել է ավելի քան 1000 երգ, որոնք կատարել են ինքը, Րեյ Չարլզը, Բոբ Դիլանը, Լայզա Մինելլին և շատ ուրիշներ: Ազնավուրի երգերը հնչում էին նաև զանազան կինոֆիլմերում։
Այժմ, կենտրոն հրավիրենք կրթահամալիրի սովորող Լյուսի Ղարիբյանին՝ երգելու մի շատ հուզիչ և գեղեցիկ կատարում, Շառլ Ազնավուրի «Լա Բոհեմ»-ը։ Կխնդրեմ, վառեք ձեր հեռախոսների լույսերը և թող այս երգի տակ ողջ Մարմարյա սրահը ողողվի սպիտակ լույսով՝ սիրո, ջերմության և համերաշխության մթնոլորտի ներքո։
Միանում է երգը, հնչում է կատարումը
Եկեք բարձր ծափահարենք տաղանդավոր Լյուսի Ղարիբյանին այս հրաշք կատարման համար։
Կրթահամալիրում մայիսյան 18-րդ հավաքի օրերը շարունակվում են։ Այս օրերին ուսումնական օրացույցը լի է տարբեր միջոցառումներով։ Անդրադառնանք դրանցից մի քանիսին։
- Ավագ դպրոցում շարունակվում են եռօրյա ճամփորդությունները տարբեր ուղղություններով։ Մեր արկածախնդիր ու ճամփորդասեր խմբերին ոչինչ ետ չի պահում ուսումնասիրելու Հայաստանի տեսարժան վայրերն ու գեղեցիկ բնությունը։ Դրա վառ օրինակն է դպրոցի կազմակերպիչ Ընկեր Լուսինեի և անգլերենի դասավանդող Ընկեր Իրինայի ղեկավարած ճամփորդությունը դեպի Լոռի։ Ամպամած եղանակն ու հորդառատ անձրևը ճամփորդող խմբին բոլորովին ետ չեն պահել Լոռվա գեղատեսիլ վայրերն ուսումնասիրելու մտքից և չնայած անձրևից նրանց թրջվելու հանգամանքին՝ խումբը չի շեղվել իր ճամփորդական ծրագրից։
- Մայիսյան 18-րդ բաց հավաքի շրջանակում կրթահամալիրի «Զենիթ» բենդը հրավիրում է ներկա գտնվելու իր մենահամերգին։ Մայիսի 23-ին, ժամը 13։00-ին՝ «Սեբաստիա» համերգասրահում, բենդը ելույթ կունենա, ներկայացնելով 10-ից ավել կատարում, ինչպես աշխարհահռչակ, այնպես էլ հայ երաժիշտների երգացանկից։ Համերգի ծրագիրը կարող եք գտնել Ավագ դպրոցի ենթակայքում։
- Հարգելի սովորողներ, մեկնարկել է հեղինակային կրթական ծրագրի ամենամյա անվանական մրցանակների ինքնաառաջադրման հայտագրումը։ Հայտերն ընդունվում են մինչև մայիսի 26-ը, ներկայացված փաթեթների հանրայնացումը մինչև հունիսի 2-ն է, մրցանակները հանձնվելու են հունիսի 9-ին։ Մրցանակներին և հայտագրման կարգերին կարող եք ծանոթանալ Ավագ դպրոցի ենթակայքում։
- Ավագ դպրոցում շարունակվում են հետազոտական աշխատանքների պաշտպանությունները։ Եվ այսօր, ժամը 13։00-ից սկսած, Ավագ դպրոցի ընթերցասրահում ելույթ կունենան 11-րդ դասարանցիներ Վահե Քոսակյանը, Հայկ Ղազարյանը և Ալբերտ Զախարբեկյանը։ Հետազոտության թեմաներն են “Մագնիսական դաշտի կիրառումը գիտության, տեխնիկայի և բժշկության մեջ” և “Օպտիկական պատրանքներ”։
- Եվ հիշեցնեմ, որ ժամը 14։30-ին, ընթերցասրահում սպասվում է կլոր սեղան “Մաթեմատիկայի դասերի կազմակերպումը առանց գրատախտակի օգնության” թեմայով։
Այժմ, դիմավորեք 11-րդ դասարանի աղջիկներին՝ կատարելու այս գեղեցիկ պարը Շառլ Ազնավուրի հայտնի “Je t’attends” երգի տակ։ Je t’attends, Ես սպասում եմ քեզ։
Աղջիկները պարում են
Բարձր ծափահարենք աղջիկներին սրահում ուրախ տրամադրություն ապահովելու համար։ Եվ նույն ուրախ տրամադրությամբ, ծափողջույններով դիմավորեք՝ “Զենիթ” բենդ։
“Զենիթ” բենդը ելույթ է ունենում
“Զենիթ” բենդ, ձեր ծափահարությունների ներքո, ղեկավար՝ Արամ Սարգսյան։
Հարգելի հավաքվածներ, մեծն շանսոնյեի հենց այս նոտայի տակ ավարտենք այսօրվա ընդհանուր պարապմունքը։ Երկօրյա հանգստից հետո բոլորիդ մաղթում եմ բարի օր, արդյունավետ և խաղաղ շաբաթվա սկիզբ։ Իսկ ձեզ համար այսօր առավոտյան ընդհանուր պարապմունքը վարեցին Արի Ագոփը և Մարիաննա Մանուկյանը։ Իսկ այժմ, բոլորիդ հրավիրում եմ սրահի կենտրոն մասնակցելու միասնական պարին՝ “Սեբաստիո”։