Հաջողակ նախագիծն այն է, երբ այն հենց սկզբից կարողանում է միավորել դրա անդամներին մի նպատակի շուրջ և սերտացնում, ավելի է մերձեցնում նրանց միասնական աշխատանքի ընթացքում։ Կարևոր է, որ յուրաքանչյուր ոք հավասարապես գիտակցի իր վրա դրված պատասխանատվությունը և լինի պատրաստակամ՝ իր ներդրումն ունենալու խմբային աշխատանքում։
Երբ առաջին անգամ լսեցի նախագծի մասին, հասկացա, որ դրա ճիշտ ծրագրման դեպքում, շատ մեծ հաջողությունների կարելի է հասնել և կարելի է այն զարգացնել տարբեր մակարդակներով և շրջափուլերով։ Առաջնային խնդիր էր տարբեր դասարաններից հավաքել մի խումբ հետաքրքրասեր և առաջադեմ գաղափարներով աշակերտների, որոնք իրոք կարող են աշխատել կոլեկտիվում և պատրաստակամ են՝ հեռուն գնալու նախագծի շրջանակներում։
Ուրախությամբ պետք է հայտնեմ, որ դա մեզ հաջողվեց, այնպես որ ցանկանում էինք վայրկյան առաջ սկսել նախագիծը։
Եվ ահա այսօր՝ շատ մեծ ոգևորությամբ ու եռանդով, տվեցինք մեր նախագծի մեկնարկը։ Եվ իհարկե, առաջին իսկ հանդիպմանը պետք էր այնպիսի ծրագիր մշակել, որ անմիջապես համախմբի և միավորի բոլոր անդամներին․ անդամների ծանոթացում, սառույց կոտրող հետաքրքիր առաջադրանքներ, կարծիքների և պատկերացումների փոխանակում և իհարկե հնարավորություն՝ ինքնաարտահայտվելու։
Պետք է ասեմ, որ մասնակիցների արձագանքն այնքան բուռն էր, որ անգամ մենք զարմացանք նրանց ոգևորության բարձր աստիճանից և պատրաստակամությունից։ Չէինք սպասում, որ առաջին իսկ հանդիպումից խումբը կարող էր այսքան ոգևորվել և խրախուսվել նախագծի նպատակներից, պահանջներից և ապագա գործունեությունից։ Կարող ենք վստահորեն և հպարտորեն ասել, որ նախագծի սկզբնական փուլը հաջողել ենք։
Ինչ վերաբերում է իմ տպավորություններին և հանդիպումից քաղած դասերին, ապա կասեմ, որ ինձ միշտ հետաքրքիր են եղել փոքր խմբակային աշխատաքնները, երբ ամեն մի խումբ որևէ երևույթի մասին կարողանում է արտահայտել իր սեփական տեսակետը, խոսել իր ուրույն պատկերացումների մասին և ասեմ, որ յուրաքանչյուր խումբ ներկայանում էր յուրովի։ Հարկ է նշել, որ մեր նախագծի շրջանակներում չկա “սխալ կարծիք” ասվածը, յուրաքանչյուրը կարող է խնդրին մոտենալ իր ուրույն ձևով, ազատորեն արտահայտել իր կարծիքը և առաջարկել խնդրի իր համար նախընտրելի տեսանկյունը։ Ավելին՝ այդպես ավելի կարող է լայնանալ մեր մտահորիզոնը տարբեր երևույթների պատկերացումների շուրջ և միգուցե, մենք նույնպես սկսենք խնդիրներին նայել այդ տարբեր տեսանկյուններից։
Եվս մեկ անգամ ասեմ, որ շատ ուրախ էի անդամներին տեսնել այդպես եռանդով լի, միմյանց օգնող և համագործակցող և իհարկե՝ այդքան ստեղծագործ մտքերով։
Վստահ եմ, որ այսպիսի եռանդուն սկիզբը նախադրյալ է հետագայում ակտիվ հանդիպում-քննարկումների, համագործակցային նախագծերի և ինքնաբացահայտմանն ուղղված կարևորագույն նպատակի իրականացմանը։ Հուսով եմ, որ մեր երկար ձգվող ճանապարհին կհայտնվեն նաև նոր մարդիկ՝ նոր գաղափարներով, նոր մտքերով և իհարկե՝ մարդիկ, ովքեր իրոք կարող են ռիսկի դիմել՝ ի նշան համայնքի և աշխարհի բարեկեցության և նորարարական գաղափարների տարածման։